ᐅయోగక్షేమాలు- దేవీకటాక్షాలు



యోగక్షేమాలు- దేవీకటాక్షాలు 

ప్రపంచానికి మూలమైన పరమాత్మను తెలియజేసే శబ్దం- ప్రణవం (ఓంకారం). దీనిలోని (అ,ఉ,మ) ఆద్యంతాక్షరాలే 'అమ్మ'గా మారాయేమో! అకారం పలకగానే ఏర్పడే, 'నోరు తెరుచుకోవడం' సృష్టిని తెలియజేస్తుంది. 'మ' కారం నోరుమూయడమనే (ఓష్ఠ్యం) క్రియ ద్వారా సంపూర్తిని సూచిస్తుంది. ఈ రెంటి నడుమ ఉన్నదే స్థితి. అందుకే 'అమ్మ' సంపూర్ణ శబ్దమయింది. ఓంకారమంత విలువైన మంత్రం 'అమ్మ'.
పరాశక్తిలోని పలు రకాల వ్యక్తీకరణలను పలు విధాల నామ రూపాలతో దర్శింపజేసే మన ఉపాసనా శాస్త్రంలో- అవన్నీ మంత్రాలుగా లభిస్తున్నాయి. దుర్గతులను దునుమాడే దుర్గాదేవిని ఎనిమిది నామాలతో కీర్తించే ఒక మంత్ర రాశిని పురాణం అందిస్తోంది. ఆ ఎనిమిది నామాలు: ఆర్యా, దుర్గా, వేదగర్భా, అంబిక, భద్రా, భద్రకాళీ, క్షేమ్యా, క్షేమంకరీ. మహిమాన్వితమైన కొన్ని నామాలను కూర్చి జపిస్తే- దాన్ని 'మాలామంత్రం' అంటారు. పై ఎనిమిది నామాల మూలామంత్రం- ఆపదలను తొలగించి, రక్షణను ఇస్తుందని మహర్షుల మాట. వీటిని నమస్కార పూర్వకంగా మంత్రాలుగా పఠించి సత్ఫలితాలు పొందవచ్చు- అని దేవీ పురాణాలు వచిస్తున్నాయి.

ఆర్యాయై నమః: 'ఆర్యా' అనే మాటకు 'పూజ్యురాలు' అని అర్థం.

పూజింపదగిన తత్వం, మహిమ, అద్భుత గుణాలు కలిగిన తల్లి జగదంబ. దేవతలు, రుషులు, బ్రహ్మ విష్ణురుద్రులు కూడా ఆరాధించే గొప్పతనం చేత ఆమె 'ఆర్యా' అనిపించుకున్నది. అసుర బాధలు ఆక్రమించినప్పుడు వేల్పులందరూ అమ్మ కరుణ అనే రక్షణ పొందారు. అర్చనకు యోగ్యమైన పవిత్రత, ఔన్నత్యం, సమర్థత కలిగినది పరాశక్తి.

దుర్గాయై నమః:సర్వజగతికి ఆశ్రయమైన శక్తి కనుక 'దుర్గా' అన్నారు. 'దు'రాచారాలనీ, 'దుః'ఖాన్నీ, 'దు'ష్టత్వాన్నీ, 'దు'ర్మార్గాన్నీ, 'దు'స్సాధ్యాన్నీ తొలగించే సమర్థురాలు... అని 'దుర్గా' నామంలోని భావం. 'భయం కలిగినప్పుడు దుర్గా నామస్మరణం వలన, భీతిని తొలగించుకుంటారు. ఏ భయమూ లేనివారు, దుర్గా కీర్తన వలన ఇతోధికమైన శుభాలను పొందుతారు. దారిద్య్రాన్నీ, దుఃఖాన్నీ, భయాన్నీ పోగొట్టే దయార్ద్ర చిత్తం గల దేవి దుర్గ'- అని 'మార్కండేయ పురాణం' లోని 'దేవీ మాహాత్మ్యం'లో మహాముని మాట.

వేదగర్భాయై నమః:'వేదాలలో ఉన్న పరతత్వం దేవి. ఆ దేవినుంచే వేదాలు ఆవిర్భవించాయి'- అని రెండు అర్థాలు ఈ నామంలో ఉన్నాయి. 'గర్భం' అనే మాట లోపలి భాగాన్నీ, మాతృత్వాన్నీ తెలియజేస్తుంది. వేదాల కన్న తల్లి జగదంబ. 'కడుపు చల్లంగ వేదాల కన్నతల్లి' అని శ్రీనాథ మహాకవి కీర్తించాడు. సర్వధర్మాలకీ, జ్ఞానాలకీ నిధి వేదం. ఆ వేదాలకు మూలం, వేదాల గమ్యం ఈ పరతత్వమే.

'వేదం' అనే మాటకు 'జ్ఞానం' అని అర్థం. జ్ఞానానికి కేంద్రమైన చైతన్యస్వరూపిణి శ్రీమాత.

అంబికాయై నమః: ప్రపంచానికి కారణమై, షోషకమై, రక్షకమైన ప్రేమ స్వరూపిణి కనుక జగన్మాతను 'అంబికా' అని పిలుస్తున్నారు. వేద మంత్రాల్లో 'అంబితమే, దేవితమే'' అని అమ్మను ప్రస్తుతించారు. తల్లుల్లోకెల్లా గొప్పతల్లి జగజ్జనని. విశ్వకారణ శక్తిని మాతృభావంతో ఆరాధించడంలో మాధుర్యం ఉంది. పిల్లలకు తల్లి గురించి జ్ఞానం లేకపోయినా, 'అమ్మా' అని పిలువగలిగే ప్రేమ భావం ఉంటేచాలు- ఆ అమ్మ అమాయకులైన బిడ్డల్ని ఆదరంగా అనుగ్రహిస్తుంది. విశ్వ మూలశక్తిపై అవగాహన లేకున్నా, ఆ శక్తిని 'జననీ' భావంతో స్మరిస్తే చాలు, అవ్యాజమైన కరుణతో ఆ తల్లి కృపను వర్షిస్తుంది.

భద్రాయై నమః: శుభాలనీ, మేలునీ కలిగించే రక్షణ శక్తిగా దేవిని ఈ నామంతో కీర్తించింది మంత్రవాంగ్మయం.

భద్రకాళ్యై నమః: ఏది ఎక్కడ ఎలా కొనసాగాలో నియమించే విశ్వనియమ శక్తిని 'కాళి' అంటారు. ఈ కాల స్వరూపిణిని మంగళకారిణిగా అనుగ్రహించేదిగా 'భద్రకాళి' అని పిలుస్తున్నారు.

క్షేమ్యాయై నమః: ఆమె స్వభావమే క్షేమం. పదిలమైన స్థితిని ప్రసాదించే దయ ఆమె గుణం కనుక క్షేమ్యా. 'యోగక్షేమా'లను వహించే కృప ఆమె నైజం.

క్షేమంకర్యై నమః: క్షేమాన్ని స్వభావంగా కలిగిన కారణంగా, క్షేమాన్ని కలిగించడమే ఆమె మహిమ. దీపం కాంతిని ఇచ్చినట్లుగా, దుర్గాంబ క్షేమాన్ని ప్రసాదిస్తోంది. ప్రయాణ సమయంలో, మార్గమధ్యంలో ఈ నామాన్ని పఠిస్తే- ఏ ప్రమాదాలూ లేని సుస్థితి లభిస్తుందని మంత్ర శాస్త్రం చెబుతోంది. -ఈ ఎనిమిది నామాల మంత్రమాలను అభీష్టసిద్ధులను అందించే అద్భుత రత్నహారంగా రుషులు సమకూర్చారు. రక్షణనీ, భద్రతనీ, క్షేమాన్నీ ప్రసాదించే ఈ శబ్ద మణిమాలను జపించి ధన్యులమవుదాం.

- సామవేదం షణ్ముఖ శర్మ